灰姑娘（海陸腔）

【文譯／謝杰雄】

 

　　有一個有錢人个餔娘發病仔咧。佢會過身个時節，就摎佢个單丁女喊到眠床前，對佢講：「親愛个妹仔，你愛永久忠誠、善良，仁慈个天公就會永久保佑你，𠊎乜會在天頂看等你，關心你。」講忒佢就眨目，轉長山去咧。細阿妹仔逐日都去屋後背阿姆个墳地噭，還合保持忠誠摎善良个本性。冷天到咧，墳地分雪花弇等，像一條白色个巾仔；等春天个日頭摎這白色个巾仔掀開來个時節，該有錢人又另外討一個餔娘咧。

　　佢渡兩個親降个妹仔嫁來老公屋下；兩個妹仔生到當靚，皮膚又白，毋過心肝當壞、當毒。這下，該衰過个前人子妹仔就無好日仔過咧。

　　佢兜講「敢做得分這戇妹仔戴在𠊎屋下？」。「麼人想食麵包，麼人就定著愛做事。煞煞落灶下去啦！」

　　佢兜搶走佢該靚靚个衫裙，分佢著一領灰色个舊襖，一雙樹頭仔做个鞋。「看啊這挶屎个公主打扮到幾靚啊！」佢兜講無停，又笑佢，又摎佢送落灶下。在灶下肚佢一日到暗都愛做粗事，天吂光就愛䟘床，來㧡水、起火、煮飯、洗衫褲。這還無算麼个，該兩個阿姊還想苦毒佢，誚㸐佢，佢兜摎荷蘭豆還有扁豆倒落火灰肚，愛佢坐在火灰該位，摎荷蘭豆、扁豆一粒一粒拈出來。暗晡頭，佢做事做悿咧，無眠床好睡目，就睡在灶頭脣个火灰肚。所以佢總係烏疏疏，歸身都係塵灰，佢兜斯喊佢「灰姑娘」。

　　有一日，厥爸愛去市場，問三個細孲仔，愛佢摎佢兜帶麼个東西轉來。一儕應講「好看个衫褲啊，」 另外一個乜講「還有珍珠摎寶石」。 阿爸問「啊你呢，灰姑娘，」「你想愛麼个？」——「阿爸，在您轉屋下个路項凴着若帽仔个第一枝樹椏，您就摎佢拗下來分𠊎斯好。」

　　這有錢人斷真摎兩個細阿妹仔買靚靚个衫褲、珍珠還有寶石。在轉屋下个路項，佢騎馬仔行過一座樹林，一枝榛樹椏揬着佢，摎佢个帽仔裝下來；佢就摎細樹椏拗下來帶轉屋下。佢照兩個細阿妹仔个心願分佢兜等路；分灰姑娘个呢，斯該枝榛樹椏。灰姑娘摎阿爸承蒙過後，斯來到阿姆个墳地，摎榛樹椏插在墳頭頂，黏時傷心大噭，噭到目汁緊流，淋著該榛樹椏頂。樹椏緊生緊大，變做一頭靚靚个樹仔。灰姑娘逐日都愛去樹下三擺，在該位緊噭還有祈求；逐擺總係有一隻白色个細鳥仔飛來停在樹頂，不管佢講出麼个願望，細鳥仔就會摎佢希望得着个東西擲分佢。

　　

　　有一擺，國王愛連辦三日宴會，愛請全國所有生到靚靚个細妹仔去參加，好分王子來為自家擇餔娘。兩個阿姊聽講佢兜乜有分人請去，心情盡暢，斯喊灰姑娘來，講：「來摎涯兜𢯭梳頭那毛，捽皮鞋，䌈鞋帶仔，𠊎兜愛去王宮个宴會啦！」灰姑娘聽着阿姊个吩咐，自家嗄目汁濫干，因為佢乜當想愛去跳舞，斯求後哀准佢乜做得去參加。後哀講：「你？灰姑娘？」 「你歸身都係灰灰，頭烏面烏，還想參加宴會！你又無靚靚个衫褲摎鞋，還想愛去跳舞？」灰姑娘呢，還係煞猛緊求，後哀包尾講：「好，𠊎摎一大碗細扁豆仔倒落火炭灰肚，係講兩點鐘內你做得全部擇出來，𠊎就同意你共下去。」灰姑娘斯行出後門來到花園肚，喊：「馴良个細月鴿仔啊、細咕咕鳥啊摎天頂全部个鳥仔啊，請你兜飛過來摎涯𢯭手拈豆仔哦：

　　好豆仔拈落細盆仔，

　　壞豆仔吞落自家肚屎。」

　　

　　堵好恁樣唱啊去，灶下个窗門就飛落兩隻細白月鴿仔，續等又來幾隻咕咕鳥，最尾天頂所有个鳥仔都一群一群飛落來，嘰嘰喳喳停在火炭灰脣頭。頭頭係月鴿仔頭磬磬，開始拈豆仔；續等，其他个鳥仔乜開始𢯭手：啄、啄、啄、啄、啄，全部个好豆仔都拈落盆肚。毋使一點鐘，佢兜斯做忒所有个事情，共下飛走咧。灰姑娘歡歡喜喜兜等豆仔去見後哀，想講這下就會肯佢去參加宴會咧。麼人知後哀嗄講：「做毋得，灰姑娘，你無衫褲，做毋得去跳舞；去咧會分人誚㸐定。」灰姑娘細阿妹仔斯噭起來，後哀又講：「你若係有辦法在一點鐘內對火灰肚拈兩碗淰淰个荷蘭豆，就分你跈去。」後哀想，這擺灰姑娘絕對做毋着咧。在後哀摎兩碗細荷蘭豆倒落火灰肚後，灰姑娘又行出後門，來到園肚喊講：「馴良个月鴿仔啊、細咕咕鳥啊摎天頂所有个鳥仔啊，請你兜飛過來摎𠊎𢯭手拈豆仔哦：

　　好豆仔拈落細盆仔，

　　壞豆仔吞落自家个肚屎。」

　　

　　黏時有兩隻月鴿仔對灶下个窗門飛落來，續等又飛來幾隻咕咕鳥，尾來天頂所有个鳥仔都一群一群飛來，嘰嘰喳喳停在火灰堆附近。月鴿仔先開始頭磬磬一息一息啄：「啄啄啄，啄啄啄」；其他个鳥仔乜跈等「啄、啄、啄、啄、啄」摎好个豆仔全部拈落盆肚。毋使半點鐘，佢兜就做忒咧，大家又共下飛走去。灰姑娘歡歡喜喜兜等兩碗豆仔去見後哀，想講這擺定著會同意佢去參加舞會咧。吂知後哀嗄講：「無辦法，你做毋得共下去。你無衫褲，無法度跳舞；你係去，𠊎兜斯會衰咧！」講煞斯一轉身，渡等佢該兩個驕傲个妹仔去參加舞會。

　　這下就伸灰姑娘一個人孤栖孤栖在屋下，佢就行到阿姆墳地前个榛仔樹下喊講：

　　細樹啊，你搖啊搖，你晃啊晃，摎金銀掞在𠊎膴身項。

　　講啊煞，細鳥仔就擲一領用金絲錢銀攣个衫裙仔分佢，一雙鑲銀个、掛花个繡花鞋。該細阿妹仔就遽遽著好，去到舞會。佢著等這身金若若个衫盡靚，兩個阿姊摎後哀都認佢毋出，還當做佢係外國个公主。佢兜根本就無想着佢係灰姑娘，話著佢還坐在屋下，著等一身屙糟个衫褲，還在火灰堆肚拈豆仔。這量時王子行到佢个面前，牽等佢个手摎灰姑娘跳舞。王子除忒灰姑娘以外，毋願摎任何一個人跳舞，所以緊牽等灰姑娘个手毋放。見擺有另外个後生人來邀請灰姑娘，王子都講：「佢係𠊎个舞伴。」（待續）
　　
（海陸腔）謝杰雄 聲檔 － 灰姑娘





　

▲BACK